Çərşənbə axşamı Fransada əhali pensiya yaşının 2030-cu ilə qədər 62-dən 64-ə qaldırılmasını nəzərdə tutan pensiya islahatına qarşı son bir ayda ikinci dəfə kütləvi etiraz aksiyası keçirib.
Senzor.az yerli KİV-ə istinadən bildirir ki, nümayiş Parisin tarixi mərkəzində yerləşən İtaliya meydanında başlayıb.
Aksiyalar Fransanın Lion, Renn, Ruen, Marsel, Nant və Monpelye kimi şəhərlərində də keçirilib. Etirazlarda Parisdə 87 min nəfər, ümumilikdə isə 2,8 milyon nəfər iştirak edib. Qeyd edək ki, yanvarın 19-da bu rəqəm 2 milyon idi.
Parisdəki beş kilometrlik yürüş Əlillər meydanında başa çatıb.
Yürüşün son dəqiqələrində polislə nümayişçilər arasında iğtişaş baş verib. Polis əməkdaşları onlara atılan daş və dəmir parçalarına qarşılıq gözyaşardıcı qazdan istifadə etməli olublar.
Etirazçılardan bəzilərinin saxlanıldığı bildirilir.
