Ukrayna daha 100 hərbçisini və bir mülki vətəndaşını əsirlikdən geri qaytarıb.
Prezident Ofisinin rəhbəri Andriy Yermak bildirib ki, 94 hərbçi Mariupolu müdafiə edib, onlardan 64-ü “Azovstal”da döyüşüb.
“Azad edilən döyüşçülər arasında qvardiyaçılar, sərhədçilər və Ukrayna Silahlı Qüvvələrinin hərbçiləri də var. Yaxınları uzun müddətdir ki, onların yolunu gözləyirdilər”, - deyə Yermak “Telegram” mesajında yazıb.
Ofis rəhbəri qeyd edib ki, sərbəst buraxılan çox sayda qəhrəman müxtəlif dərəcəli xəsarətlər alıb. Yermak onu da əlavə edib ki, aidiyyəti təşkilatlar Rusiya əsirliyində qalan digər hərbi əsirlərin geri qaytarılması istiqamətində işləri davam etdirirlər.
