Türkiyədə zəlzələ nəticəsində həlak olanların sayı 45 min nəfəri ötüb.

Senzor.az bildirir ki, bu barədə ölkənin Fövqəladə Halların İdarə Olunması Agentliyi (AFAD) məlumat yayıb.

Məlumata görə, təbii fəlakət 45 min 89 nəfərin ölümünə səbəb olub. 

Xatırladaq ki, fevralın 6-da ocağı Türkiyənin Kahramanmaraş şəhərinin Pazarcık rayonunda olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub. Həmin zəlzələlərdən sonra indiyə qədər 11 min 20 afterşok qeydə alınıb. Eyni zamanda zəlzələ bölgəsindən 1 milyon 971 min 589 şəxs təxliyə edilib.

Yeri gəlmişkən, bu iki güclü zəlzələ Livan, Kipr, İraq, İsrail, İordaniya, İran və Misirdə də hiss edilib.

Təbii fəlakət Türkiyə və Suriyada böyük dağıntı və onminlərlə itkiyə səbəb olub. Türkiyənin zəlzələ baş verən 10 şəhərində 3 aylıq fövqəladə vəziyyət elan olunub.

Bu hadisə Türkiyədə 1939-cu ildən bəri qeydə alınan ən güclü zəlzələ kimi tarixə düşüb.