Belarus lideri Aleksandr Lukaşenko İrana səfər edəcək.
Senzor.az Belarus mediasına istinadən bildirir ki, səfər martın 12-13-də baş tutacaq.
Lukaşenko İran prezidenti İbrahim Rəisi ilə danışıqlar aparacaq.
Danışıqların əsas mövzusu ikitərəfli münasibətlərin bütün spektri üzrə əməkdaşlığın inkişaf etdirilməsinə vurğu edilməklə, ticari-iqtisadi məsələlər olacaq. Prezidentlərin görüşü nümayəndə heyətləri üzvlərinin iştirakı ilə məhdud və geniş tərkibdə keçiriləcək. Tərəflər sənaye, kənd təsərrüfatı, nəqliyyat və logistika sahələrində layihələrin həyata keçirilməsini müzakirə edəcəklər. Regionda və bütövlükdə dünyada vəziyyətə xüsusi diqqət yetiriləcək.
Danışıqların yekunu olaraq qarşılıqlı maraq doğuran sahələrdə əlaqələrin inkişafına dair bir sıra beynəlxalq sənədlər imzalanacaq.
Xatırladaq ki, Belarus Prezidenti bundan əvvəl Çində səfərdə olub.
Senzor.az
