Macarıstanın xarici işlər və ticarət naziri Peter Siyarto Rusiyaya səfər edib.
Bu barədə macar nazir "Facebook" hesabında bildirib.
"Macarıstanın enerji təchizatının təhlükəsizliyi üçün fasiləsiz qaz nəqli, neft nəqli və nüvə yanacağının nəqli lazımdır. Bu üç şərti yerinə yetirmək üçün Macarıstan-Rusiya enerji əməkdaşlığı fasiləsiz olmalıdır. Bu, siyasi zövq məsələsi deyil, fizika məsələsidir. Bu gün Moskvada biz Macarıstanın enerji təchizatının təhlükəsizliyi üçün zəruri olan əməkdaşlığın ən mühüm məsələlərini müzakirə edəcəyik", - nazir paylaşımında bildirib.
O səfəri çərçivəsində Rusiya Baş nazirin enerji məsələləri üzrə müavini Aleksandr Novakla görüşüb. "Ölkəmizi təbii qazla təmin edən “Türk Axını” boru kəmərinin fiziki və texniki təhlükəsizliyi, neft təchizatımızı təmin edən “Dostluq” boru kəməri ilə tranzit daşımaların saxlanılması və nüvə sənayesini təhdid edən sanksiyaların qarşısının alınması müzakirəmizdə olan məsələlərdir", - o qeyd edib.
Macarıstan xarici işlər nazirinin “Rosatom”un baş direktoru Aleksey Lixaçevlə də görüşü gözlənilir.(APA)
