"Taxıl müqaviləsi" çərçivəsində gəmilərin yoxlanılması bərpa edilib.
Bu barədə “TRT Haber” telekanalı ölkənin Müdafiə Nazirliyindəki mənbələrə istinadən məlumat yayıb.
“Milli Müdafiə Nazirliyindəki mənbələr Türkiyənin təşəbbüsləri nəticəsində yoxlamaların bərpa olunduğunu və “taxıl dəhlizi”nin yenidən işə salındığını bildiriblər”, - deyə məlumatda bildirilir.
Bundan əvvəl BMT may ayında “Qara Dəniz Təşəbbüsü”ndə iştirak edən gəmilərin yoxlanışlarının sayının gündə orta hesabla 2,9-a qədər azaldığını bildirmişdi (apreldə bu rəqəm gündə orta hesabla 4 yoxlama idi). Xüsusilə, mayın 7-8-də axtarışlar ümumiyyətlə aparılmayıb.
Rusiya, Türkiyə, Ukrayna və BMT nümayəndələri tərəfindən 2022-ci il iyulun 22-də imzalanan taxıl sazişi Odessa da daxil olmaqla üç limandan Ukrayna taxılının, ərzaq və gübrələrin Qara dəniz vasitəsilə ixracını nəzərdə tutur. Gəmilərin hərəkətinin koordinasiyasına İstanbulda birgə koordinasiya mərkəzi cavabdehdir.(AzVision.az)
