Pakistanın Xayber-Paxtunxva əyalətində “İslam Alimləri Assambleyası” partiyasının konqresində kamikadzenin törətdiyi partlayışda ölənlərin sayı 44 nəfərə çatıb.
Senzor.az bildirir ki, yerli KİV bu barədə Hayber-Paxtunxva əyalətinin səhiyyə naziri Riaz Ənvara istinadən məlumat yayıb.
Onun sözlərinə görə, terror aktı nəticəsində 100-dən çox adam yaralanıb: “Terrorçu səhnənin bilavasitə yaxınlığında özünü partladıb”.
Qeyd edək ki, Pakistanın Baş naziri Şahbaz Şərif hadisənin araşdırılması və günahkarların müəyyən edilməsi barədə göstəriş verib.
**19:58
Pakistanın şimal-qərbindəki Heybər-Paxtunxva əyalətində İslam Alimləri Assambleyası partiyasının konqresində partlayış törədilib.
Senzor.az yerli KİV-ə istinadən bildirir ki, ölkənin fövqəladə hallar xidmətləri və yerli hakimiyyət orqanlarının yaydığı məlumata görə, kamikadzenin törətdiyi partlayış nəticəsində azı 35 nəfər ölüb,
200-dən çox insan müxtəlif dərəcəli xəsarət alıb və xəstəxanaya yerləşdirilib.
Partlayış partiya liderlərindən birinin təxminən 400 nəfər tərəfdarının qarşısında çıxış edərkən baş verib.
Pakistanın baş naziri Şahbaz Şərif hadisənin araşdırılması və məsuliyyət daşıyanların tapılması barədə göstəriş verib.
Hələlik məsuliyyəti heç bir qruplaşma öz üzərinə götürməyib.
