Birləşmiş Millətlər Təşkilatının Baş Assambleyasında (BMT) Beynəlxalq Bərpa Olunan Enerji Agentliyinin (IRENA) təsis edildiyi 26 yanvar tarixinin “Beynəlxalq Təmiz Enerji Günü” elan edilməsi ilə bağlı qətnamə qəbul edilib.
Senzor.az xəbər verir ki, təmiz enerjiyə hədəflənən xüsusi günün yaradılması enerji keçidinə nail olmaq, həmçinin, “Davamlı İnkişaf üzrə 2030 Gündəliyi”nin icrası istiqamətdə işlərin sürətləndirilməsinə töhfə verəcək.
Qeyd edək ki, Beynəlxalq Bərpa Olunan Enerji Agentliyi (İRENA) 26 yanvar 2009-cu il tarixində Bonn şəhərində təsis edilib. İRENA beynəlxalq səviyyədə bərpa olunan enerji sahəsi üzrə ən mötəbər beynəlxalq təşkilatlardan sayılır. Yarandığı dövrdən indiyə kimi təşkilata artıq 163 dövlət üzv olmuş və 21 dövlət isə üzvlüyə namizəddir.
Azərbaycan Respublikası 2009-cu ildən İRENA-nın üzvlüyünə qəbul edilib və 2014-cü il mayın 2-də Milli Məclisin qərarı ilə İRENA-nın nizamnaməsinin ratifikasiyası ilə onun tamhüquqlu üzvü olub.
