Rusiya taxıl sazişi üzrə yeni təkliflər Rusiyadan kənd təsərrüfatı məhsullarının ixracını normallaşdırmağa kömək etməyəcək.
Bu barədə Rusiyanın Xarici İşlər Nazirliyi bəyanat yayıb.
Bəyanatda qeyd olunub ki, BMT-nin təklif etdiyi variantlar Rusiyanın maraqlarına cavab vermir və sazişin bərpası üçün konkret vasitələr təklif etmir.
Xatırladaq ki, Taxıl Dəhlizi Sazişi Rusiya-Ukrayna müharibəsi nəticəsində Ukrayna taxıl gəmilərinin Qara dəniz limanlarından keçə bilməməsi səbəbindən 2022-ci ilin iyul ayında Türkiyə, Rusiya, Ukrayna və Birləşmiş Millətlər Təşkilatı arasında Ankarada imzalanıb. Saziş çərçivəsində dəhliz vasitəsilə 1 avqust 2022-ci il tarixindən indiyə qədər 1000-dən çox gəmi ilə 33 milyon tona yaxın taxıl daşınıb. Sonuncu dəfə mayın 17-də İstanbulda Türkiyə hakimiyyətinin vasitəçiliyi ilə 60 gün müddətinə uzadılan “Taxıl sazişi”nə iyulun 17-də Rusiya tərəfindən xitam verilib.
Rusiya prezidenti Vladimir Putin bildirib ki, Rusiya taxıl sazişinin bərpası barədə yalnız ölkənin kənd təsərrüfatı məhsullarının ixracına qoyulan qadağa aradan qalxdıqdan sonra düşünə bilər.
