Ankara və Vaşinqton F-16 qırıcılarının tədarükü məsələsini müzakirə ediblər.
Bu barədə Türkiyə Prezidenti Rəcəb Tayyib Ərdoğan “Böyük İyirmiliy”in (G20) sammitindən sonra keçirilən mətbuat konfransında deyib.
O, amerikalı həmkarı Cozef Baydenlə Türkiyəyə F-16 qırıcılarının tədarükü məsələsini müzakirə etdiyini bildirib.
Ərdoğanın sözlərinə görə, görüş qeyri-rəsmi şəraitdə keçib.
“Təəssüf ki, F-16 məsələsi İsveçin NATO-ya üzvlüyü prosesi ilə bağlıdır. Bu yanaşma bizi ciddi şəkildə narahat edir. Lakin Türkiyə Böyük Millət Məclisi belə bir qərar qəbul etmədikcə, mən “hə” (İsveçin NATO üzvlüyünə) deyə bilmərəm”, - Ərdoğan vurğulayıb.
Qeyd edək ki, 2022-ci ilin iyulunda ABŞ Konqresinin Nümayəndələr Palatası Türkiyə ordusunun Yunanıstanın hava məkanını pozmasını əsas gətirərək F-16 qırıcılarının Türkiyəyə satışını qadağan edib.(“Report”)
