Türkmənistan Prezidenti Sərdar Berdiməhəmmədov bu ölkənin qəhrəmanı adına layiq görülüb.

Senzor.az yerli KİV-ə istinadən bildirir ki, bazar günü Türkmənistan Xalq Maslaxatının (Xalq Şurasının) iclası zamanı Berdiməhəmmədova Türkmənistan Qəhrəmanı adının verilməsi ilə bağlı təntənəli mərasim keçirilib.

Mərasimdə ölkə parlamentinin sədri Dünyagözəl Gülmanova “Türkmənistan Prezidenti Berdiməhəmmədov Sərdar Qurbanquliyeviçə Türkmənistan Qəhrəmanı adının verilməsi haqqında” ölkə parlamentinin qərarını oxuyub.

Qərara əsasən, dövlət başçısı bu ada ölkənin milli müstəqilliyinin əsaslarının, onun bitərəfliyi prinsiplərinin möhkəmləndirilməsində böyük şəxsi xidmətlərinə, dövlətin dinamik inkişafında, beynəlxalq nüfuzunun möhkəmləndirilməsində xüsusilə müstəsna xidmətlərinə, dövlətlər və xalqlar arasında əməkdaşlığın, dostluğun və qardaşlığın möhkəmləndirilməsinə yönəlmiş təşəbbüslərə görə layiq görülüb.