Cümə günü Pakistanın şimal-qərbindəki Xayber Paxtunxva əyalətində intiharçı-terrorçu  məsciddə partlayış törədib.

Sinxua agentliyi xilasedici qruplara istinadən məlumat verib ki, partlayış nəticəsində 5 nəfər ölüb, 10 nəfər yaralanıb.

Bildirilib ki, terror aktı Hanqu rayonunda polis bölməsinin ərazisində yerləşən məscidin ibadət zalında baş verib.

“İki intiharçı-terrorçu polis bölməsinin əsas qapısında polisə əl qumbaraları atıb. Onlardan biri polislə atışmada həlak olub, digəri isə məscidin içərisinə girə bilib”, - deyə xilasetmə idarəsinin nümayəndəsi Bilal Faizi bildirib. O, əlavə edib ki, terrorçunun özünü partlatması nəticəsində məscidin damı qismən uçub.

Onun sözlərinə görə, partlayış zamanı məsciddə 30-40 nəfər olub. Onlardan bəziləri dağıntılar altında qalıb.

Xilasetmə əməliyyatı başa çatıb, xəsarət alanlar tapılaraq rayon hərbi xəstəxanasına çatdırılıb.

Hələlik heç bir qruplaşma hücuma görə məsuliyyəti üzərinə götürməyib.