İsrailin Müdafiə Ordusunun qırıcıları oktyabrın 13-də gecə saatlarında HƏMAS qruplaşmasının yeraltı tunellər, hərbi birləşmələr və postlar, hərbi komandanlıq mərkəzləri kimi istifadə edilən iqamətgahlar, silah anbarları, rabitə otaqları və hədəfə alınan yüksək vəzifəli şəxslər də daxil olmaqla 750 hərbi obyektinə zərbələr endirib.

Senzor.az yerli KİV-ə istinadən bildirir ki, bu barədə İsrail Müdafiə Ordusu məlumat yayıb.

Bildirilib ki, İsrailin döyüş təyyarələri Qəzza zolağında HƏMAS-ın çoxsaylı hərbi obyektlərini, o cümlədən hərbi, silahlı hücumlar üçün istifadə etdiyi çoxmərtəbəli binada yerləşən 12 hərbi obyektini bombalayıb.

Məlumata əsasən, İsrail əsgərləri Qəzza şəhərindəki HƏMAS-ın hərbi komandanlıq mərkəzində minaatanlardan atəş açmaqda ixtisaslaşmış üç silahlını da məhv ediblər.