Qazaxıstan və Fransa strateji əhəmiyyət kəsb edən mineral ehtiyatlarla bağlı əməkdaşlıq haqqında bəyannamə imzalayıblar.
Bu barədə Qazaxıstan Prezidenti Kasım-Jomart Tokayevin mətbuat xidməti onun Fransanın dövlət başçısı Emmanuel Makronla görüşündən sonra məlumat yayıb.
“Biz "Boehringer Ingelheim", "Total Energies" və "Alstom" ilə də razılaşmalar əldə etmişik”, - deyən Qazaxıstan Prezidenti bunun üçün xüsusi işçi qrupunun yaradılmasını təklif etdiyini bildirib.
Danışıqlar zamanı tərəflər ticarət, iqtisadiyyat və investisiya sahələrində qarşılıqlı fəaliyyətin əhatə dairəsinin genişləndirilməsinə xüsusi diqqət yetiriblər.
Bundan başqa, bu ölkələrin liderləri Qazaxıstanda beynəlxalq (fransız) məktəblərin yaradılması və respublikanın orta təhsil müəssisələrində fransız dilinin tədrisi; ümumi gücü 1 giqavat olan külək elektrik stansiyalarının tikintisi layihəsi üzrə birgə müəssisə haqqında saziş imzalayıblar.
**10:27
Fransa prezidenti Emmanuel Makron noyabrın 1-də Qazaxıstana rəsmi səfər edib.
Senzor.az yerli KİV-ə istinadən bildirir ki, onu Astana beynəlxalq hava limanında Qazaxıstanın Baş naziri Alixan Smailov qarşılayıb.
Məlumata görə, tərəflər arasında qısa söhbət zamanı Alixan Smailov bildirib ki, bu səfər Astana ilə Paris arasında strateji əməkdaşlığın inkişafına təkan verəcək.
Qeyd edək ki, Qazaxıstan Prezidenti Kasım-Jomart Tokayev və Emmanuel Makron iqtisadi-ticarətə, sərmayə qoyuluşuna və energetika sahələrində əməkdaşlığın gücləndirilməsinə, habelə beynəlxalq və regional hadisələrə dair məsələləri müzakirə edəcəklər.
