Noyabrın 26-da Yer kürəsində mülayim maqnit qasırğası müşahidə olunur.
Məlumatı kosmik hava monitorinqləri aparan Rusiya Tətbiqi Geofizika İnstitutu yayıb.
Qeyd olunub ki, indi Yerin maqnit sahəsində pozulma dərəcəsi G2 səviyyəsinə çatıb. Bu da beş indikatorlu monitorinq şkalasında “orta” deməkdir.
Odur ki, Yer kürəsində enerji sistemləri ilə bağlı problemlər ola bilər. Radionaviqasiyada fasilələr və yüksək tezlikli radio rabitəsinin kəsilməsi də mümkündür.
“Report” xatırladır ki, son yeddi gündə elm adamları Günəşdə bir neçə güclü “M” sinifli alovlar qeydə alıblar. Bütövlükdə maqnit qasırğasının loqarıfmik indeksini xarakterizə edən Kp əmsalının orta qiyməti son bir neçə gündə 2-5 intervalında dəyişir.
