Rusiya ən yaxın qonşuluğunda - Cənubi Qafqazda və Mərkəzi Asiyada siyasi təcridlə üzləşir.
Bunu NATO-nun Baş katibi Yens Stoltenberq Davosda keçirilən Dünya İqtisadi Forumu çərçivəsində paneldə çıxışında deyib.
NATO Baş katibi bildirib ki, müharibələr təbiət etibarı ilə proqnozlaşdırıla bilmir və Ukraynadakı müharibənin necə davam edəcəyi və Rusiyanın Ukraynadakı itkilərinin Rusiyanın daxilində dəyişikliyə səbəb ola biləcəyini söyləmək çətindir:
"Ancaq Rusiyanın Ukraynadakı itkilərinə cavab olaraq Rusiya daxilində hər hansı böyük dəyişikliklə bağlı işarə görünmür, lakin əlbəttə ki, sürprizlər də ola bilər".
Stoltenberq deyib ki, Rusiyanın Ukraynaya qarşı başlatdığı bu müharibədə 300 000-ə qədər əsgər itirməsi, minlərlə hərbi texnika və yüzlərlə təyyarə itirilməsi Rusiya üçün, adi rus vətəndaşları üçün məna kəsb etməlidir. "Ölkə iqtisadiyyatı çöküş yaşayır, onlar ağır iqtisadi bədəl ödəyir, onlar siyasi bədəl ödəyir, Rusiya siyasi təcridə məruz qalıb, hətta ən yaxın qonşuluğunda, Cənubi Qafqaz regionunda və Mərkəzi Asiyada siyasi təcridlə üzləşir", - o deyib.
