Ukraynanın şərqindəki Xarkov şəhəri tamamilə elektrik enerjisiz qalıb.

Bu barədə şəhər meri İqor Terexov bildirib.

Onun sözlərinə görə, bir sıra partlayışlardan sonra Xarkov tamamilə enerjisiz qalıb, şəhərin su və istilik təchizatında ciddi problemlər yaranıb.

Qeyd edək ki, Rusiya Xarkov daxil olmaqla Ukraynanın bir sıra şəhərlərini kütləvi raket atəşinə tutub. Nəticədə Ukraynanın enerji strukturuna ciddi ziyan dəyib.

**16:08

Rusiya qoşunları Zaporojye vilayətinin Mirnoye kəndini tutub.

Bu barədə Rusiya Müdafiə Nazirliyindən bildirilib.

Qeyd edək ki, kənd Melitopol rayonunda yerləşir. Yaşayış yeri Moloçnaya çayının sağ sahilindədir.

Kəndin 3 mindən çox sakini var.

**14:27

Rusiya Silahlı Qüvvələrinin Ukraynaya kütləvi raket hücumu nəticəsində 3 nəfər ölüb, 13 nəfər yaralanıb.

Bu barədə Ukrayna Prezident Ofisinin rəhbərinin müavini Oliksey Kuleba məlumat verib.

Onun sözlərinə görə, hücum nəticəsində azı 3 nəfər itkin düşüb. Qeyd olunub ki, həmçinin mülki evlərə də ziyan dəyib.

Xatırladaq ki, ötən gecə Ukraynanın regionlarına - Odessa, İvano-Frankivsk, Lvov, Dnepropetrovsk, Xarkov, Zaporijjya, Kirovohrad, Xmelnitski, Vinnitsa və Sumi vilayətlərinə 150-dən çox raket atılıb. Ölkənin bəzi yerlərində elektrik enerjisi kəsilib.

**10:12

Ötən gecə Rusiya Silahlı Qüvvələri pilotsuz uçuş aparatları ilə Ukrayna ərazisinə kütləvi raket hücumu həyata keçirib.

Senzor.az bildirir ki, bu barədə Ukrayna Hərbi Hava Qüvvələri məlumat yayıb.

Qeyd olunub ki, ölkənin əksər bölgələrində hava hücumu xəbərdarlığı elan edilib.

Partlayışlarla əlaqədər bəzi şəhərlərdə elektrik enerjisi dayanıb. Təkcə Zaporojye vilayətində 7 ev dağılıb, 35 evə ziyan dəyib. Həmçinin yaralılar var.

Bundan başqa, ölkənin Nijni- Novqorod, Lvov, Sumı Xmelnitski və digər vilayətlərinə də raket hücumu olub.

Xarkovda 15-ə yaxın partlayış səsi eşidilib.

Məlumata görə, raket hücumları həmçinin Zaporojye Atom Elektrik Stansiyasının fəaliyyətinə də təsir edib. Belə ki, elektrik xətti zədələnib.