Çin Rusiyanı dəstəkləmək “problemini həll etməsə", bunu Vaşinqton edəcək.
Bunu ABŞ-ın dövlət katibi Antoni Blinken Çin Xalq Respublikasının sədri Si Cinpinlə görüşdə deyib.
Onun sözlərinə görə, Çin Rusiyanı dəstəkləməyə davam edərsə, Avropa ilə münasibətləri yaxşılaşdıra bilməyəcək. Dövlət katibi əlavə edib ki, transatlantik təhlükəsizliyin təmin edilməsi ABŞ-ın əsas hədəfidir:
“Bugünkü müzakirələri zamanı mən açıq şəkildə bildirdim ki, Çin bu problemi həll etməsə, biz həll edəcəyik”.
Çin lideri Si Cinpin isə öz növbəsində ölkəsinin mövqeyini belə ifadə edib:“Amerika ikiüzlülüyü dayandırmalıdır. ABŞ-ın sözü ilə əməli düz gəlmir”.
O vurğulayıb ki, Vaşinqton Pekinə düşmən kimi yanaşmamalıdır.
**13:38
ABŞ dövlət katibi Entoni Blinken Çin Xalq Respublikasının Sədri Si Cinpinlə görüşüb.
Bu barədə Çin Xarici İşlər Nazirliyi məlumat yayıb.
XİN-dən bildirilib ki, “Çin və ABŞ rəqib deyil, tərəfdaş olmalı, "bir-birini incitməkdənsə, uğur qazanmağa kömək etməli, amansız rəqabətə girməkdənsə, ümumi zəmin tapmalıdır”.
ÇXR sədrindən əvvəl Blinken həmkarı Van İ ilə beş saat yarımdan çox görüş keçirib və ABŞ diplomatı bunu “konstruktiv” adlandırıb.
**09:14
Çində səfərdə olan ABŞ dövlət katibi Antoni Blinken Çinin xarici işlər naziri Van İ ilə görüşüb.
Senzor.az yerli KİV-ə istinadən bildirir ki, görüşdə nazir Van İ ABŞ-dan Çinin suverenlik, təhlükəsizlik və inkişaf maraqları ilə bağlı “qırmızı xətt”i keçməməyi tələb edib.
Pekinin tərəflərin bir-birinin əsas maraqlarına qarşılıqlı hörmət prinsipinə tərəfdar olduğunu bildirən Van İ Çinin daxili işlərinə qarışmamağı, ölkənin inkişafına mane olmamağı məsləhət görüb. O, ölkəsinin Çin-ABŞ münasibətlərinə bəşəriyyət üçün ortaq gələcəyi olan cəmiyyət qurmaq prizmasından yanaşdığını deyib.
“Çinin mövqeyi həmişə ardıcıl olub”, - söyləyən Çin rəsmisi əlavə edib ki, ölkəsi qarşılıqlı hörmət, dinc yanaşı yaşamaq və qarşılıqlı faydalı əməkdaşlıq prinsiplərinə sadiqdir və Çin-ABŞ münasibətlərinin sabit, sağlam və davamlı inkişafını təşviq etməyə çalışır.
Qeyd edək ki, ABŞ dövlət katibi Antoni Blinken aprelin 24-dən Çində səfərdədir. ABŞ-ın baş diplomatı səfərinə Şanxay şəhərindən başlayıb. Bu, onun son bir ildə Çinə 2-ci səfəridir. Dövlət katibi rəsmi görüşlərdən əvvəl bildirib ki, Vaşinqton və Pekin ikitərəfli münasibətlərə məsuliyyətlə yanaşmalıdır. O, Vaşinqton və Pekinin dünya qarşısında iki ölkə arasındakı münasibətlərə görə məsuliyyəti öz üzərimizə götürmək öhdəliyi olduğunu deyib.
Ekspertlər hesab edirlər ki, Antoni Blinkenin cari səfəri olduqca gərgin dövrə təsadüf edir. ABŞ bu günlərdə Tayvana bir neçə milyard dollarlıq yardım barədə qərar qəbul edib. Bundan başqa, Prezident Cozef Bayden Çinə məxsus “Tik-Tok” sosial şəbəkəsini ABŞ-da qadağan etməyə imkan verən qanun layihəsini imzalayıb. Belə bir vəziyyətdə Blinkenin Çin rəsmiləri ilə görüşlərində əldə olunacaq nəticələr beynəlxalq təhlilçiləri dərindən maraqlandırır. Güman olunur ki, tərəflər Rusiya-Ukrayna münasibətləri, Yaxın Şərqdə və Koreya yarımadasında vəziyyət, Cənubi Çin dənizi, o cümlədən Tayvan məsələlərinə dair fikir mübadiləsi aparıblar.
