Rusiya Prezidenti Vladimir Putinin Çinə səfəri zamanı Çin lideri Si Cinpin ilə danışıqlarının əsas mövzularından biri enerji sektorunda yeni təşəbbüslər olacaq.
TASS bildirir ki, bu barədə Rusiya dövlət başçısının köməkçisi Yuri Uşakov brifinqdə məlumat verib.
“İkitərəfli əməkdaşlığın əsas hərəkətverici qüvvəsi energetikadır. Ötən il Çinə neft, boru kəməri ilə qaz, LNG və kömür təchizatı üzrə rekordlar yenidən qırılıb. Liderlərin danışıqlarında, təbii ki, enerji sahəsində yeni təşəbbüslər də müzakirə olunacaq”, - Y.Uşakov deyib.
Qeyd edək ki, Rusiya Prezidenti Vladimir Putin Çin sədri Si Sinpinin dəvəti ilə mayın 16-17-də Pekinə səfər edəcək.
