BMT Təhlükəsizlik Şurasına sədrlik bir ay müddətinə Rusiyaya keçib.

Senzor.az bildirir ki, bu barədə Rusiya KİV-i məlumat yayıb.

Məlumata görə, Rusiyanın rəhbərlik etdiyi Təhlükəsizlik Şurasının ilk iclası Nyu York vaxtı ilə bazar ertəsi səhər keçiriləcək. İclasda Təhlükəsizlik Şurasının qarşıdakı ay üçün iş proqramı təsdiq ediləcək.

Rusiyanın BMT-dəki daimi nümayəndəsi Vasili Nebenzyanın sözlərinə görə, ölkə sədrliyi dövründə üç əsas tədbir planlaşdırıb.

Söhbət daha ədalətli, demokratik və davamlı dünya nizamının qurulması üçün çoxtərəfli əməkdaşlığa dair açıq müzakirələrdən gedir. Bu iclaslarda Rusiya tərəfi xüsusilə yeni qlobal “təhlükəsizlik tənlik” məsələsinə toxunacaq. Tədbir iyulun 16-na planlaşdırılıb. İyulun 17-də Yaxın Şərq nizamlanması məsələlərinə dair açıq müzakirələr aparılmalıdır. İyulun 19-da Rusiya sədrliyinin üç əsas tədbirindən biri - BMT və regional təşkilatlar, yəni KTMT, MDB və ŞƏT arasında əməkdaşlığa dair Təhlükəsizlik Şurasının müzakirəsi planlaşdırılır.

Qeyd edək ki, sonuncu dəfə Rusiya Federasiyası dünya təşkilatının əsas strukturunun işini 2023-cü ilin aprelində idarə edib.