Livanın bütün ərazisində elektrik enerjisi kəsilib.

Senzor.az yerli KİV-ə istinadən bildirir ki, bu barədə ölkənin elektrik enerjisi istehsalı, ötürülməsi və paylanmasının 90 faizinə nəzarət edən “Electricite du Liban” enerji şirkəti məlumat yayıb.

Dövlət şirkəti qeyd edib ki, ölkəni enerji ilə təmin edən sonuncu Az-Zəhrani elektrik stansiyasının yanacaq ehtiyatı tükəndiyi üçün tamamilə işini dayandırıb. Bununla da Livanın bütün ərazisi işıqsız qalıb.

Məlumata görə, hazırda ölkənin bütün əsas infrastruktur obyektləri, o cümlədən beynəlxalq aeroportu və dəniz limanı enerjisiz qalıb.

Livanın cənubunda yaşayan sakinlərə suya qənaət etmək tövsiyə olunub, çünki elektrik enerjisinin kəsilməsi səbəbindən nasos stansiyaları da fəaliyyətini dayandıra bilər.