Fransız aktyoru Alen Delonun Orlean yaxınlığındakı Duşi kommunasındakı malikanəsində dəfn mərasimi keçirilib.
TASS xəbər verir ki, aktyor malikanənin ərazisində tikdirdiyi kilsədə dəfn edilib.
Mərasimdə onun üç övladı və yaxın dostları iştirak edib.
Xatırladaq ki, aktyor avqustun 18-də 88 yaşında Fransanın Duşi kommunasındakı evində dünyasını dəyişib. 
**13:35
Məşhur fransız aktyoru Alen Delonun dəfn olunacağı Duşi kommunasındakı malikanəsinin təhlükəsizliyini təmin etmək üçün 80 jandarm yerləşdiriləcək.
BFMTV telekanalı xəbər verir ki, Delonun dəfn mərasimi bu gün saat 17.00-da (Bakı vaxtı ilə 18.00) keçiriləcək. Mərasimə kino ulduzunun üç övladı və məhdud sayda qonaq qatılacaq.
“Aktyorun şənbə günü dəfn olunacağı Duşidəki malikanəsinin təhlükəsizliyini təmin etmək üçün səksən jandarm göndərilib”, - deyə telekanalın açıqlamasında bildirilir.
Bundan əlavə, Delon ailəsinin xahişi ilə foto və video çəkilişlərin qarşısını almaq üçün malikanənin ərazisi üzərində dronların uçuşuna qadağa qoyulacaq.
Ümumilikdə, dəfn mərasimində təxminən 40 nəfərin iştirak edəcəyi bildirilir. Aktyor nə dəbdəbəli dəfn mərasimi, nə də milli vidalaşma istəməyib. O, yaşadığı və 35 itinin basdırıldığı yerdə dəfn olunacaq.
Xatırladaq ki, fransız səhnə və kino aktyoru, rejissor və ssenarist Alen Delon ötən bazar günü 88 yaşında vəfat edib.
