Ermənistanın “Mülki müqavilə” partiyasının keçmiş fəalı, axtarışa verilmiş hakim Tatul Asilyan Rusiyada tapılıb.
Senzor.az bildirir ki, bu barədə “Sputnik Ermənistan” Daxili İşlər Nazirliyinin mətbuat xidmətinə istinadən məlumat yayıb.
"Asilyan 2024-cü ilin mayında nəqliyyat vasitəsini idarə etmə qaydalarını pozmaqda ittiham edilərək axtarışa verilib. Rusiya tərəfi isə axtarışda olan şəxsin tapılması barədə məlumat ötürüb", - Daxili İşlər Nazirliyinin sözçüsü Narek Sarkisyan bildirib.
Qeyd edək ki, Asilyan ötən il siyasi qalmaqala səbəb olan bir sıra çağırışları ilə gündəmə gəlmişdi. O, hökumət əleyhinə mitinqlərdə iştirak edən Qarabağ ermənilərinin Ermənistandan deportasiyasını təklif edirdi. Asilyan 2023-cü ilin noyabrında partiyadan xaric edilib.
