Rusiya Trampın xüsusi nümayəndəsi ilə danışıqlardan sonra narkotikə görə məhkum edilmiş ABŞ-ın keçmiş diplomatını azad edib.
Senzor.az bildirir ki, ABŞ-ın milli təhlükəsizlik müşaviri Mayk Uoltsun "X" sosial şəbəkəsində Rusiya ilə məhbus mübadiləsi danışıqları haqqında yaydığı bəyanatda belə deyilir.
"Bu gün Prezident Donald Tramp və onun xüsusi nümayəndəsi Stiv Uitkoff bəyan edirlər ki, cənab Uitkof Rusiyada saxlanılan amerikalı Mark Fogellə birlikdə Rusiya hava məkanını tərk edir. Prezident Tramp, Stiv Uitkof və Prezidentin müşavirləri Rusiyanın xoşməramlı jesti olan mübadilə haqqında danışıqlar aparıblar, hansı ki, bu, Ukraynadakı qəddar və dağıdıcı müharibəni bitirmək üçün düzgün istiqamətdə hərəkət etdiyimizi göstərir", - deyə bəyanatda bildirilib.
Qeyd olunub ki, Rusiya ABŞ səfirliyinin üç ildən artıq həbsdə olan keçmiş əməkdaşı Mark Fogeli azad edib.
Rusiya mətbuatı da yazıb ki, keçmiş diplomatın azadlığa buraxılmasını Trampın xüsusi nümayəndəsi Stiv Uitkoff təmin edib.
Rusiya rəsmiləri isə nə Uitkoffun gəlişini, nə də Fogelin azad edilməsini təsdiqləyiblər.
Qeyd edək ki, Fogel 2021-ci ildə həyat yoldaşı ilə birlikdə içərisində həşiş və marixuana olan 14 elektron siqaret kartriclə hava limanında saxlanılmışdı. ABŞ vətəndaşı onurğa sütununda cərrahiyyə əməliyyatı keçirdikdən sonra elektron siqaret kartricin ona həkim tərəfindən dərman kimi təyin olunduğunu və bu dərmanların Rusiyada qadağan olunduğundan xəbərsiz olduğunu iddia etmişdi. Buna baxmayaraq 2022-ci ilin iyununda Moskvanın Ximki Şəhər Məhkəməsi Vogeli narkotik qaçaqmalçılığına görə cəzasını ciddi rejimli cəzaçəkmə müəssisəsində çəkmək şərtilə 14 il müddətinə azadlıqdan məhrum etmişdi.
**14:26
Göyərtəsində ABŞ Prezidenti Donald Trampın Yaxın Şərq üzrə xüsusi nümayəndəsi Stiv Uitkoffun olduğu iddia edilən “Gulfstream G650ER” təyyarəsi bu gün Moskvanın "Vnukovo" hava limanına eniş edib.
“RİA Novosti” xəbər verir ki, bu, “Flightradar” xidmətinin məlumatlarında öz əksini tapıb.
Uçuş və eniş yerləri haqqında məlumat əlçatan olmasa da, xidmətin xəritəsinə əsasən, təyyarənin Vaşinqtondan uçduğunu və Moskva vaxtı ilə saat 10:17 radələrində Vnukovo hava limanı yaxınlığında olduğunu görmək olar.
Amerikalı blogerlərin məlumatına əsasən, HƏMAS və İsrail arasında atəşkəsin əldə olunmasına görə məsul olan Uitkoff Trampın ən yaxın tərəfdarlarından biridir.
Şayiələrə baxmayaraq, Rusiya Prezidentinin rəsmi nümayəndəsi Dmitri Peskov Trampın hər hansı bir nümayəndəsinin Moskvaya səfəri barədə Kremlin məlumatlı olduğunu təkzib edib.
Daha bir maraqlı məqam. Yerli KİV-lərin yaydığı məlumata görə, ABŞ-ın Moskvadakı səfiri Linn Treysi bu gün Rusiya Xarici İşlər Nazirliyinə (XİN) gedib.
Səfərin səbəbləri hələlik məlum deyil.
KİV-in məlumatına görə, Treysi əvvəllər sosial şəbəkələrdəki videomüraciətində Vaşinqtonun, fikir ayrılıqlarına baxmayaraq, Moskva ilə dialoqa hazır olduğunu bəyan edib.
Onun sözlərinə görə, ABŞ və Rusiya arasında diplomatik səylərə "böyük ehtiyac" var.
