ABŞ Prezidenti Donald Tramp rusiyalı həmkarı Vladimir Putinlə danışıqlardan dərhal sonra Ukrayna lideri Volodimir Zelenski ilə telefon danışığı aparıb.
Bu barədə “RBK-Ukraina” Ukrayna Prezidentinin məsləhətçisi Dmitri Litvinə istinadən məlumat yayıb.
Litvinin sözlərinə görə, Ukrayna və Amerika liderləri təxminən bir saat danışıblar.
Ukrayna Prezidenti özü isə sosial şəbəkə hesablarında bildirib ki, ABŞ Prezidenti Donald Trampla telefon danışığı zamanı sülhün əldə edilməsinin mümkünlüyü barədə müzakirə aparıblar.
“Trampla uzun söhbətimiz oldu. Komanda şəkilində birgə istəyimizi bildirdik. Biz birlikdə nə edə biləcəyimizə maraq göstərdiyinə görə Prezident Trampa minnətdaram”, - deyə Zelenski vurğulayıb.
Zelenski bildirib ki, Ukrayna hamıdan çox sülh istəyir: “Biz Rusiyanın təcavüzünü dayandırmaq və etibarlı, davamlı sülhə zəmanət vermək üçün Amerika ilə ümumi addımlarımızı müəyyən edirik. Prezident Trampın dediyi kimi, gəlin, bunu həyata keçirək. Biz gələcək təmaslar və görüşlər barədə razılığa gəldik”.
Qeyd edək ki, daha əvvəl Tramp Putinlə “məhsuldar” telefon danışığı barədə məlumat verərək “dərhal danışıqlara başlamaq” niyyətində olduğunu vurğulamışdı. Kreml rəhbəri ilə söhbətini şərh edən Tramp Zelenskiyə “həmən” zəng edəcəyini bildirmişdi.
