Serbiyada minlərlə insan ölkənin üçüncü böyük şəhəri olan Nişdə etiraz aksiyası keçirib.
Senzor.az yerli KİV-ə istinadən bildirir ki, əsasən tələbələrdən ibarət olan nümayişçilər şəhərin mərkəzi meydanına toplaşıb, əllərində bayraqlar şüarlar səsləndiriblər.
Etirazçılar ötən il noyabrın 1-də Novı Sad şəhərindəki dəmiryolu vağzalında 15 nəfərin ölümü, 2 nəfərin ağır yaralanması ilə nəticələnən qəzadan 4 ay keçməsi ilə əlaqədar bu addım atıblar. Aksiyanın 18 saat davam edəcəyi bildirilib.
Qeyd edək ki, Novı Sad dəmiryolu vağzalındakı qəza Serbiyada gündəmdən düşmür. Hadisədən ötən dövr ərzində, eləcə də etiraz aksiyaları başlayandan bəri tikinti, nəqliyyat və infrastruktur naziri Qoran Vesiç, daxili və xarici ticarət naziri Tomislav Momiroviç, Baş nazir Milos Vuçeviç, eləcə də Novi Sad şəhərinin bələdiyyə sədri Milan Dyuriçin istefa veriblər. Serbiya Prezidenti Aleksandar Vuçiç hökumətin yenidən formalaşdırılacağını bildirib.
