Avropa İttifaqı (Aİ) ölkələri Amerika silahlarına mümkün alternativləri müzakirə etmək üçün müntəzəm şəkildə qapalı iclaslar keçirirlər. Buna səbəb Prezident Donald Trampın ABŞ-ın Avropa təhlükəsizliyində iştirakını azaltmağa yönəlmiş siyasəti olub.
Avropalı diplomata istinad edən “Defence One” portal ABŞ-ın iştirak etmədiyi dörd belə görüşün artıq baş tutduğunu bildirib. Müzakirələr zamanı rəsmilər Amerika silahlarından asılılığın azaldılmasının çətin, bahalı və yavaş həyata keçəcəyini etiraf ediblər.
Öz müdafiəsini gücləndirmək istəyinə baxmayaraq, əksər ölkələr Vaşinqtonla əlaqələri kəsmək fikrində deyillər.
“Biz lazım olmayan yerlərdə divarlar tikmək istəmirik”, - danışıqların iştirakçılarından biri deyib.
“Reuters” agentliyinin məlumatına görə, vəziyyət ABŞ-ın Ukrayna ilə kəşfiyyat mübadiləsini dayandırmasından sonra daha da pisləşib.
“Bu, Amerika rəhbərliyinə etimada zərbə vurdu və ABŞ-dan hərbi təchizatın davamlılığını şübhə altına aldı. Aİ Vaşinqtonun Brüsselə siyasi təzyiq göstərmək üçün Amerika silahlarından asılılığından istifadə edəcəyindən ehtiyatlanır”, - agentlik yazır.
Azvision.az xatırladır ki, bu arada Avropa Komissiyası (AK) Aİ ölkələrini hərbi xərcləri artırmağa, resursları birləşdirməyə və müdafiə sektorunda birgə layihələr hazırlamağa dəvət edib. Təşəbbüslərdən bəziləri Aİ daxilində satınalmalara üstünlük verilməsini nəzərdə tutur ki, bu da Amerika şirkətlərinin iştirakını məhdudlaşdıra biləcək.
