Gürcüstan Prezidenti Mixail Kavelaşvili ABŞ-ın FARA qanununa bənzər “Xarici agentlər haqqında” qanunu imzalayıb.
Senzor.az bildirir ki, qanun Gürcüstanın Qanunvericilik Bülleteninin rəsmi portalında dərc olunub.
Daha əvvəl parlament bu qanunu üçüncü və yekun oxunuşda qəbul etmişdi. Qeyd olunur ki, qanun dərc edildiyi gündən sonrakı 60-cı gündə qüvvəyə minir.
Qeyd edək ki, fevralın əvvəlində hakim “Gürcü arzusu - Demokratik Gürcüstan” partiyası xarici agentlərlə bağlı ABŞ-ın FARA (Foreign Agents Registration Act) xarici agentlərin qeydiyyatına bənzər qanun qəbul edəcəyini bəyan etmişdi. Partiya liderlərinin bəyanatlarına görə, onlar yeni qanunun əsas məqsədi ölkədə inqilabi prosesləri dəstəkləmək olan qeyri-hökumət təşkilatlarının xaricdən maliyyələşməsinə qarşı mübarizədə ötən ilin mayında qəbul edilmiş “Xarici təsirin şəffaflığı haqqında” qanundan daha effektiv olacağını gözləyirlər.
Gürcüstandakı qanun, Amerika qanunundan fərqli olaraq, fiziki şəxslərə şamil edilmir və yalnız illik gəlir vergisi bəyannaməsi təqdim edilməməsinə görə cərimə nəzərdə tutur. Amerika qanunları isə 5 ilə qədər həbs cəzasını nəzərdə tutur.
Yeni qanunun icrasına Gürcüstanın Korrupsiyaya Qarşı Mübarizə Bürosu nəzarət edəcək. 
Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas və genişlənmə üzrə Avropa komissarı Marta Kos isə hesab edirlər ki, “Xarici agentlərin” qeydiyyatı haqqında qanun və yayım haqqında qanuna düzəlişlər Gürcüstan parlamenti tərəfindən “ictimaiyyətlə lazımi məsləhətləşmələr aparılmadan” qəbul edilib.
Onların bəyanatı çərşənbə günü, aprelin 2-də Avropa Xarici Fəaliyyət Xidməti (EEAS) tərəfindən dərc edilib.
EEAS bildirib ki, yeni qanunvericilik “Gürcüstan hakimiyyətinə müxalif fikirləri sıxışdırmaq və repressiv siyasətlərini sərtləşdirmək üçün əlavə imkanlar verir”.
Onların fikrincə, qanunlar vətəndaş cəmiyyəti fəallarının işini şübhə altına alır, vətəndaş cəmiyyətini və müstəqil medianı təhdid edir, insan hüquqlarını və əsas azadlıqlarını məhdudlaşdırır və demokratik qərar qəbuletmə proseslərinə xələl gətirir.
Gürcüstan parlamentinin qərarları "demokratiya, qanunun aliliyi və media plüralizmi kimi Aİ dəyərlərinə kökündən uyğun gəlmir və bizim namizəd ölkədən gözlədiyimizdən çox aşağıdır", - Kallas və Kos xəbərdarlıq ediblər.
Onların fikrincə, Tbilisinin qanunvericilik təşəbbüsləri “Gürcüstanın Aİ-yə gedən yoluna mənfi təsir göstərəcək”.
