İranın dini lideri Əli Xamenei Tehran və Vaşinqton arasında planlaşdırılan danışıqların uğurlu olacağı təqdirdə İrana birbaşa ABŞ investisiyalarına müsbət yanaşır.
"Associated Press" xəbər verir ki, bunu İran Prezidenti Məsud Pezeşkian deyib.
"İranın Ali lideri ayətullah Əli Xamenei ABŞ-ın İrana investisiya yatırmasına etiraz etmir. Amerikalı investorlar, gəlin və investisiya yatırın", - o qeyd edib.
M.Pezeşkianın fikrincə, belə bir təklif ABŞ Prezidenti Donald Trampı maraqlandıra bilər. O vurğulayıb ki, Tehran nüvə silahı yaratmağa çalışmır, ölkənin nüvə proqramı sülhməramlı və elmi xarakter daşıyır.
"Biz nüvə bombası yaratmağa çalışmırıq. Siz (Qərbi nəzərdə tutur) bunu artıq 100 dəfə yoxlamısınız. Bunu daha 1000 dəfə də edə bilərsiniz", - o əlavə edib.
