İspaniya, Portuqaliya, Andorra və Fransanın bir hissəsində genişmiqyaslı elektrik enerjisi kəsintisi qeydə alınıb. 

Senzor.az xarici KİV-ə istinadən bildirir ki, yaranmış vəziyyət Qərbi Avropanı, sözün əsl mənasında, iflic edib: milyonlarla insan işıqsız, internetsiz qalıb, metro işləmir, işıqforlar, tramvaylar, hava limanları fəaliyyətini dayandırıb.

“İspaniyada elektrik şəbəkələrinin bərpası 6-10 saat çəkəcək”, - “El País” qəzeti bildirir.

“Financial Times” qəzetinin məlumatına görə, genişmiqyaslı nasazlıqdan sonra ölkələrin enerji sistemləri 10 QVt-dan çox güc itirib. Nəşrin qiymətləndirməsinə görə, bu, Avropanın müasir tarixində ən böyük nasazlıqlardan biri olub - milyonlarla sakini əhatə edib.

İspaniya dövlət şəbəkə operatorunun ilkin versiyasına görə, elektrik kəsintisinin səbəbi enerji sistemində nasazlıq ola bilər. Madrid hava limanı və paytaxt metrosunun işində fasilələr müşahidə olunur.