Astara şəhərində yerləşən “Panorama” otel-restoranda əxlaqsızlıq yuvası təşkil edən qadın cinayət məsuliyyətinə cəlb edilib.

“Qafqazinfo”nun məlumatına görə, iaşə obyektinin icarədarı 1965-ci il təvəllüdlü Elnarə Babayeva (soyad şərtidir) barəsində cinayət Məcəlləsinin 244-cü (Əxlaqsızlıq yuvası təşkil etmə) maddəsi ilə iş açılıb.

Araşdırmalar zamanı müəyyən edilib ki, E.Babayeva dəniz kənarında yerləşən oteli 600 manat aylıq ödənişlə icarəyə götürərək işlədib. Bu müddət ərzində o, müxtəlif şəxslərin oteldə pul qarşılığında görüşməsinə şərait yaradıb və bundan maddi gəlir əldə edib.

Astara sakinlərindən birinin polisə müraciətindən sonra oteldə əməliyyat keçirilib və əxlaqsızlıq yuvasının təşkil edilməsinin üstü açılıb.

Cinayət işi üzrə keçirilən məhkəmə prosesində təqsirləndirilən qadın onkoloji xəstəlikdən əziyyət çəkdiyini bildirib. Həkim rəyində də onda bağırsaq xərçəngi xəstəliyinin olması qeyd edilib.

Astara Rayon Məhkəməsinin 22 aprel tarixli hökmü ilə Elnarəyə 2 il islah işləri cəzası verilib.