Böyük Britaniyada Mühafizəkarlar Partiyasının bir qrup yüksək vəzifəli nümayəndəsi hazırkı Baş nazir Liz Trassın istefasını müzakirə etmək üçün toplantı təşkil edəcək.

“The Guardian”ın yazdığına görə, görüş bu gün, oktyabrın 17-də baş tutmalıdır.

Bəzi mühafizəkarlar hökumət başçısının dərhal istefasını tələb edəcəklər, digərləri isə vergilərin azaldılması proqramının uğursuzluğundan sonra Trassı açıq şəkildə vəzifəsindən getməyə çağırmağı planlaşdırır.

“O, hazırda gözləmə zalındadır və bunu özü də bilir. İndi o, prosesdə iştirak edib öz şərtləri ilə müəyyən qədər davam edəcək, yoxsa müqavimət göstərməyə çalışıb, məcburiyyət qarşısında qalacaq – bu, zaman məsələsidir”,- deyə adı açıqlanmayan eks-nazirlərdən biri nəşrə verdiyi şərhdə bildirib.

Qəzet onu da vurğulayıb ki, Trassın istefası ilə bağlı iclasa 15-20 eks-nazir və digər yüksək rütbəli deputatlar dəvət olunub. Tədbirin əsas təşəbbüskarları baş nazir postu uğrunda mübarizədə Trassın rəqibi olan Rişi Sunakın tərəfdarlarıdır.(“Report”)