Sentyabrın 8-də Sabirabad Rayon Polis Şöbəsinin əməkdaşlarına qarşı zor tətbiq olunması ilə bağlı yerli prokurorluğa məlumat daxil olub..
Senzor.az Sabirabad Rayon Prokurorluğuna istinadən bildirir ki, Sabirabad şəhəri H.Əliyev prospektində “VAZ 2106” markalı 10-CE-632 dövlət qeydiyyat nişanlı avtomobilin sürücüsü Azər Həsənov qayda pozuntusuna yol verdiyinə görə həmin ərazidə xidmət aparan Sabirabad RPŞ-nin DYP Bölməsinin yol patrul xidməti əməkdaşları Naməddin İbrahimov və Ramik Rəhimov tərəfindən barəsində inzibati xəta haqqında protokol tərtib edilməsi üçün saxlanılıb. Lakin o, polis əməkdaşlarını nalayiq ifadələrlə söyüb-təhqir edib, hətta bununla kifayətlənməyərək onlara hücum edib, geyim formalarını çıxarıb, eləcə də, zor tətbiq etməklə müxtəlif dərəcəli bədən xəsarətləri yetirib.
Faktla bağlı Sabirabad Rayon Prokurorluğunda Cinayət Məcəlləsinin 221.1 (xuliqanlıq) və 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə cinayət işi başlanıb.
Azər Həsənov şübhəli şəxs qismində tutularaq istintaqa cəlb edilib..
Hazırda cinayət işi üzrə istintaq davam edir.
