Böyük Britaniya hökuməti yanacaq böhranı ilə mübarizə tədbirləri çərçivəsində ordunu yüksək hazırlıq vəziyyətinə gətirib.
“RIA Novosti” xəbər verir ki, bu barədə ölkənin Biznes, Energetika və Sənaye Nazirliyindən bildirilib.
“Britaniyada yanacaq daşıyan hərbi tankerin sürücüləri yanacağı ən çox ehtiyac duyulan yerlərə çatdırmaq üçün hazır vəziyyətə gətiriləcəklər. Eyni zamanda yüksək səviyyədə yanacaq tədarükünü təmin edəcəklər”, - deyə nazirliyin açıqlamasında qeyd olunur.
Ölkənin müdafiə naziri Ben Uolles ordunun xüsusi təlim keçəcəyini və “ən çox hiss edildiyi yerdə nəqliyyat yükünün səviyyəsini azaltmağa kömək edəcəyini” deyib.
Səlahiyyətlilər həmçinin yük maşını sürücülərinin lisenziyalarını yeniləmək üçün yenidən imtahan verməkdən azad ediblər, çünki prosedur üç gün çəkir.
Xatırladaq ki, Britaniya yük maşını və yanacaq tankerləri sürücülərinin çatışmazlığı səbəbindən son bir neçə ay ərzində ərzaq təchizatı zəncirində fasilələrlə üzləşib. Bu da bəzi yanacaqdoldurma məntəqələrinin bağlanmasına səbəb olub. Səlahiyyətlilər yanacaq tədarükündə heç bir problem olmadığını bildirsələr də, ölkə sakinləri təşviş içində benzin almağa başlayıblar.
