Prezident Rəcəb Tayyib Ərdoğan Türkiyəyə səfər edən Almaniya Kansleri Angela Merkellə görüşüb.
Senzor.az bildirir ki, görüş Türkiyə Prezident Adminstrasiyasının İstanbuldakı Huber köşkündə baş tutub və 1 saat çəkib.
Nahar fasiləsindən sonra liderlər mətbuat konfransı keçiriblər.
R.T. Ərdoğan bildirib ki, Kansler olduğu dönəmdə A.Merkel təşəbbüskar olmaqdan və məsuliyyət daşımaqdan heç zaman çəkinməyib. Türkiyə lideri qeyd edib ki, xanım Merkelin diplomatik təcrübəsini hiss etdirdiyi başqa bir istiqamət Türkiyə- Avropa İttifaqı (Aİ) münasibətləridir: “Türkiyə olaraq Avropa İttifaqına tam üzvlük yolunda qarşımıza çıxan onlarla çətinliyin dəf olunmasında bizə kömək edən xanım Merkelin yardımlarını daim təqdirlə xatırlayacağıq”.“16 il qısa bir müddət deyil. Hörmətli Merkel bu müddətdə Almaniyada çox uğurlu işlərə imza atdı” deyən Türkiyə Prezidenti sentyabrın 26-da Almaniyada keçirilən seçkilərdən sonrakı yeni hökumətə, eləcə də Kansler vəzifəsində Türkiyəyə vida səfəri edən A.Merkelə uğurlar arzulayıb.
Angela Merkel isə deyib ki, Türkiyə NATO-nun üzvü olaraq onlar üçün vacib tərəfdaşdır.
“Türkiyənin iki qitə arasında necə körpü rolu oynadığını görürük. Geostrateji baxımdan bir-birimizə bağlıyıq. Rəcəb Tayyib Ərdoğanla görüşdə ayrı-ayrı mövzularda müzakirələr apardıq. Ortaq mənfəətlərimiz var. Almaniyada fəaliyyətə başlayacaq gələcək hökumət də bunu belə qəbul edəcək. Bir-birimizə inamımız var”, - Kansler vurğulayıb.
