G20 ölkələri liderlərinin görüşündə iştirak etmək üçün İtaliyaya yola düşən ABŞ Prezidenti Cozef Baydenin təyyarəsi Romanın Fiumiçino şəhərinin Leonado da Vinçi hava limanına enib.Senzor.az bildirir ki, bu barədə Ağ Evin mətbuat xidməti məlumat yayıb.
Məlumata əsasən, dövlət başçısının təyyarəsi Bakı vaxtı ilə saat 04:24-də eniş edib, saat 04:36-da isə ABŞ Prezidenti və onun xanımı Cill Bayden təyyarədən çıxıblar.
Daha sonra onlar kortecin müşayiəti ilə hava limanını tərk ediblər.
Qeyd edilir ki, C.Baydenin Avropaya səfərinin ilk dayanacağı Vatikan olacaq. Burada Roma Papası Fransisk ABŞ liderini qəbul edəcək.
Bu arada C.Baydenin milli təhlükəsizlik üzrə köməkçisi Ceyk Sallivan brifinq zamanı deyib ki, ABŞ Prezidenti İtaliyada Türkiyə Prezidenti Rəcəb Tayyib Ərdoğanla da görüşəcəyinə ümid edir: "Onun Qlazqoda Türkiyə Prezidenti ilə görüşəcəyini düşünürəm. Heç bir təsdiqim yoxdur, amma hesab edirəm ki, ABŞ Prezidenti buna ümid edir".
