Almaniya Kansleri Angela Merkel Rusiya Prezidenti Vladimir Putinə zəng edib.Senzor.az Rusiya KİV-inə istinadən bildirir ki, telefon zəngi Belarus-Polşa sərhəddində miqrantlarla polis qüvvələri arasında baş verən toqquşmalarla bağlı olub.
Belə ki, Almaniya Kansleri Belarus lideri Aleksandr Lukaşenkonun miqrantları Avropa Birliyi sərhədlərinə qəsdən yönləndirməkdə və bununla sanksiyalara görə Brüsseldən qisas almaqda ittiham edib. O, Putindən bu hallara son qoyulması üçün Lukaşenko ilə danışmasını xahiş edib.
Moskva isə Brüsselə Minsklə danışıqlara getməyi məsləhət görüb.
Bu arada Belarusun xarici işlər naziri Vladimir Makey ölkəsinin Avropa İttifaqı ilə dialoqa hazır olduğunu bəyan edib. Bu barədə o, Moskvada rusiyalı həmkarı Sergey Lavrovla görüşdən sonra deyib.
“Biz, Brüssel də daxil olmaqla, digər Avropa dövlətlərinin polisindən müəyyən siqnallar alırıq. Bəli, bu vəziyyətdən çıxmalıyıq, amma necə, onu bilmirik. Buna görə də gəlin heç olmasa məxfi şəkildə, haradasa zirzəmilərdə, meşələrdə danışaq, lakin nəhayət normal münasibətlərə gəlməyimizə imkan verəcək fikir mübadiləsi aparaq. Biz həmişə dialoqa hazır olduğumuzu və istənilən məsələni dialoq yolu ilə həll etməyə hazır olduğumuzu bildirmişik”, - nazir vurğulayıb.Onun fikrincə, gec-tez vəziyyətin özü bütün tərəfləri Belarusla Avropa ölkələri arasında münasibətlərdə yaranmış böhranın həlli yollarını axtarmağa məcbur edəcək.
