Gürcüstanda koronavirusun “omikron” ştamına yoluxanların sayı kəskin artıb. Senzor.az bildirir ki, bu barədə ölkənin Xəstəliklərə Nəzarət və İctimai Sağlamlıq Milli Mərkəzi məlumat yayıb.
Qeyd olunub ki, yanvarın 2-nə olan məlumata əsasən, ölkədə “omikron”a yoluxanların sayı 148-ə çatıb. Onların 55-i son sutkada yoluxub.
Xatırladaq ki, Gürcüstanda koronavirusun mutasiyaya uğramış yeni - “omikron” ştamına ilk yoluxma halı dekabrın 20-də qeydə alınıb.
Mərkəzdən onu da bildiriblər ki, Gürcüstanda son sutka ərzində koronavirusa bütövlükdə 3 590 yeni yoluxma faktı qeydə alınıb, 1 955 nəfər müalicə olunaraq sağalıb, 67 pasiyent vəfat edib.
Beləliklə, ölkədə indiyədək COVID-19 infeksiyası 942 173 nəfərdə aşkarlanıb. Onların 904 903-ü sağalıb, 14 009-u isə ölüb.
