Qazaxıstan Prezidenti Kasım - Jomart Tokayev Türkiyəyə rəsmi səfərə gedib.
Senzor.az Qazaxıstan mediasına istinadən bildirir ki, Tokayevi paytaxt Ankaranın Esenboğa Beynəlxalq Hava Limanında türkiyəli həmkarı Rəcəb Tayyib Ərdoğan şəxsən qarşılayıb.
Tokayevin gəlişi şərəfinə fəxri qarovul dəstəsi düzülüb.
...Hava limanında Qazaxıstan Prezidenti Kasım-Jomart Tokayev və Türkiyə lideri Rəcəb Tayyib Ərdoğan arasında qısa söhbət olub.
"Qonaqpərvərliyinizə görə sizə təşəkkür etmək istəyirəm. Görüş üçün xüsusi olaraq hava limanına gəlməyiniz mənim üçün böyük şərəfdir. Ölkələrimiz arasında heç bir ziddiyyət yoxdur. Bizi təkcə dostluq deyil, həm də səmərəli əməkdaşlıq bağlayır. Sabah bizim mühüm danışıqlarımız olacaq", - Tokayev bildirib.
Qeyd edək ki, iki günlük səfər proqramı çərçivəsində iyulun 29-da Ankarada Türkiyə-Qazaxıstan Yüksək Səviyyəli Strateji Əməkdaşlıq Şurasının beşinci iclası keçiriləcək. İki ölkə arasında bir sıra sənədlərin imzalanacağı gözlənilir.
