İsrailin Baş naziri Benyamin Netanyahu Qəzza ilə bağlı ölkə mətbuatına açıqlama verib.
O, qismən atəşkəs və əsirlərlə bağlı razılaşmanın artıq mümkün olmadığını bəyan edib.
Netanyahu bununla bağlı suallara "ABŞ Prezidenti Donald Trampı eşitdiniz. Məncə, hər şey bitdi" cavabını verib.
Baş nazir Qəzzada atəşkəs və əsir mübadiləsi razılaşmasına nail olmaq üçün hər cür səy göstərdiklərini iddia edib. Qeyd edib ki, diri və ya ölü, bütün əsirlərin azad olunmasını istəyir.
Publika.az bildirir ki, HƏMAS nümayəndə heyəti Qahirənin dəvəti ilə Qəzzada atəşkəs danışıqları aparmaq üçün növbəti dəfə Misirə gedib. HƏMAS bəyan edib ki, nümayəndə heyəti rəsmi İsrailin Qəzzaya hücumlarını dayandırmaq və humanitar yardım axınını asanlaşdırmaq yollarını müzakirə etmək üçün ilkin təmaslara başlayıb.
