ABŞ 12 günlük müharibə zamanı ən müasir hərbi texnikadan istifadə etsə də, İran xalqının müqaviməti qarşısında nəticə əldə edə bilmədi.

"Mehr" agentliyi xəbər verir ki, bunu İranın ali dini lideri Ayətullah Xamenei deyib.

Qəzza zolağındakı müharibəyə toxunan Xamenei qeyd edib ki, bölgədə baş verən “soyqırım” və onun məsul şəxsləri “bütün dünya tərəfindən lənətlənir”. O, İsrailin Baş nazirini “dünyanın ən çox nifrət edilən adamı” adlandırıb.

Xameneinin sözlərinə görə, Qəzza müharibəsi Vaşinqtonu beynəlxalq arenada “indiyə qədər görünməmiş dərəcədə təcrid vəziyyətinə” salıb. O, bunun səbəbi kimi ABŞ-ın İsrailə açıq dəstəyini göstərib.

Ayətullah Xamenei mövcud ABŞ administrasiyasını “müharibə təhrikçisi” adlandıraraq, İranın bu hökuməti dialoqa layiq tərəfdaş hesab etmədiyini vurğulayıb.

O, həmçinin ABŞ-ı Ukraynada müharibənin başlanmasına səbəb olmaqda ittiham edib və baş verən münaqişənin əsas günahkarı kimi Vaşinqtonu göstərib.