Rusiya Prezidenti Vladimir Putinin ABŞ nümayəndə heyəti ilə Moskvada apardığı danışıqlar başa çatıb və üç saat yarım davam edib.
Senzor.az bildirir ki, bu barədə brifinqdə Rusiya Prezidentinin köməkçisi Yuri Uşakov məlumat verib. Onun sözlərinə görə, Rusiya–ABŞ məsləhətləşmələri son dərəcə konstruktiv və açıq mühitdə keçib.
Uşakov bildirib ki, Vladimir Putinin ABŞ Prezidentinin xüsusi nümayəndəsi Stiven Uitkoff və iş adamı Cared Kuşnerlə təmasları məzmunlu və konstruktiv olub. Onun sözlərinə görə, danışıqlar açıq və etimadlı xarakter daşıyıb.
Uşakov qeyd edib ki, görüşdə ABŞ Ümumi Xidmətlər Administrasiyası Federal Satınalmalar Xidmətinin komissarı Joşua Qruenbaum da iştirak edib. O, Ağ Evin baş müşaviri və iqtisadi məsələlər üzrə mütəxəssisdir və ilk dəfə Amerika nümayəndə heyətinə qoşulub.
Onun sözlərinə görə, görüşün əsas məqsədlərindən biri amerikalıların ukraynalılar və Avropa tərəfdaşları ilə təmaslarının nəticələri barədə məlumat almaq və bundan sonra iki ölkə tərəfindən gələcək fəaliyyət istiqamətlərini razılaşdırmaq olub.
Uşakov qeyd edib ki, bu istiqamətdə növbəti addım artıq razılaşdırılıb.
Rusiya Prezidentinin köməkçisi həmçinin bildirib ki, Rusiya və ABŞ yanvarın 23-də Əbu Dabidə təhlükəsizlik məsələləri üzrə Ukrayna nümayəndələrinin iştirakı ilə üçtərəfli işçi qrupunun ilk iclasını keçirməyə razılaşıblar.
Onun sözlərinə görə, Əbu-Dabidə təhlükəsizlik məsələləri üzrə üçtərəfli danışıqlarda Rusiya nümayəndə heyətinə Rusiya Silahlı Qüvvələri Baş Qərargahı Baş İdarəsinin rəisi, admiral Kostyukov rəhbərlik edəcək. Nümayəndə heyətinin tərkibinə Rusiya Müdafiə Nazirliyinin yüksək vəzifəli nümayəndələri də daxil edilib.
**01:08
Kremldə Rusiya Prezidenti Vladimir Putin və ABŞ Prezidentinin xüsusi nümayəndəsi Stiven Uitkoff arasında görüş başlayıb.
Senzor.az yerli KİV-ə istinadən bildirir ki, bu barədə Kremlin Mətbuat xidməti məlumat yayıb.
Danışıqlarda Rusiya Prezidentinin beynəlxalq məsələlər üzrə köməkçisi Yuri Uşakov, Prezidentin xüsusi nümayəndəsi Kirill Dmitriyev və ABŞ Prezidenti Donald Trampın kürəkəni, iş adamı Cared Kuşner də iştirak edirlər.
