Gürcüstanın Kutaisi şəhərində qanunsuz olaraq nüvə və radioaktiv maddələr almağa cəhd edən iki nəfər xarici ölkə vətəndaşı saxlanılıb.
APA bildirir ki, bu barədə Gürcüstanın Dövlət Təhlükəsizliyi Xidmətində (DTX) keçirilmiş brifinqdə bildirilib.
Həmin şəxslər uran nüvə materialını və "Cesium-137" radioaktiv maddəsini 3 milyon ABŞ dollarına almağı və qeyri-qanuni yolla digər ölkənin ərazisinə keçirməyi planlaşdırıblar.
Cinayətkar planın həyata keçirilməsi üçün əcnəbilərin son həftələrdə Gürcüstana daimi olaraq gəldikləri, nüvə materiallarının və radioaktiv maddələrin alınması və daşınması üçün əlverişli şəraitin yaradılmasında fəal iştirak etdikləri müəyyən olunub.
Sözügedən maddələrin müxtəlif cinayətlər, o cümlədən terrorçuluq məqsədləri üçün istifadə olunduğu qeyd edilib.
Faktla bağlı istintaq aparılır.
