İranda "İran Xalq Mücahidləri Təşkilatı" ("Mücahid-e Xalq") terror qruplaşması ilə əlaqəli olan, hökumət əleyhinə iğtişaşlarda iştirak edən iki nəfər edam olunub.

Bu barədə "Tasnim" agentliyi məlumat yayıb.

Məlumata görə, təqsirləndirilən şəxslər Tehranda qumbaraatandan istifadə etməklə silahlı hücum da daxil olmaqla, terror aktlarının təşkilində təqsirli biliniblər. İstintaq və məhkəmə prosesləri başa çatdıqdan sonra hər ikisi edam cəzasına məhkum edilib. İran Ali Məhkəməsi hökmü təsdiqləyib və təqsirləndirilən şəxslər martın 30-da səhər edam ediliblər.

Oxu.az xatırladır ki, 2025-ci il dekabrın 29-da Tehranda İran rialının kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb.

İğtişaşların zirvəsi 8 yanvar axşamına təsadüf edib, bu zaman ən azı 12 mülki vətəndaş, o cümlədən bir uşaq həlak olub. Hakimiyyət orqanları 25 hüquq-mühafizə əməkdaşının həlak olduğunu bildirib. Tehran meri Əlirza Zakani deyib ki, etirazçılar paytaxtda 25 məscidi yandırıb, 26 banka, üç tibb mərkəzinə, 10 dövlət müəssisəsinə, 48 yanğınsöndürən maşına, 42 avtobus və təcili yardım maşınına, həmçinin 24 mənzilə ziyan vurublar. İran hakimiyyəti iğtişaşçıları terrorist adlandırıb və hadisələrin təşkilində İsrail və ABŞ-ı təqsirləndirib.