İran Prezidenti Məsud Pezeşkian Hörmüzqan, Buşəhr, İsfahan və Qum əyalətlərinin qubernatorları ilə ayrı-ayrılıqda telefon danışığı aparıb.
Bu barədə “Tasnim” agentliyi məlumat yayıb.
Prezident telefon danışıqlarında qubernatorlara verilmiş səlahiyyətlər çərçivəsində bərpa işlərinin sürətləndirilməsinin vacibliyini vurğulayıb.
Məsud Pezeşkian ölkənin bəzi əyalətlərinə dəyən ziyanın idarə olunması və aradan qaldırılması ilə bağlı hökumətin yerində apardığı izləmələrin davamı kimi, zərər çəkmiş bölgələrin son vəziyyəti, yardım işlərinin gedişi və bərpa proqramları barədə ətraflı məlumat alıb.
Prezident bu danışıqlarda bərpa prosesinin sürətləndirilməsinin və insanların həyatında normal vəziyyətin bərpasının vacibliyini vurğulayaraq, bütün aidiyyəti dövlət qurumlarına maksimum güclə və tam koordinasiya ilə fəaliyyət göstərməyi tapşırıb.
Pezeşkian maliyyə resurslarının vaxtında təmin olunması, inzibati prosedurların sadələşdirilməsi, bürokratiyanın azaldılması və bərpa layihələrinin həyata keçirilməsində ictimaiyyətin, qeyri-hökumət təşkilatlarının, özəl sektorun imkanlarından istifadə edilməsinin vacibliyini qeyd edib.
Prezident həmçinin zərərçəkmişlərin sosial və tibbi ehtiyaclarının paralel şəkildə qarşılanmasının önəmini vurğulayaraq, məqsədyönlü dəstək paketlərinin hazırlanması və icrası, zərər görmüş bizneslərin dəstəklənməsi, daha çox ziyan çəkmiş bölgələrdə səhiyyə xidmətlərinin gücləndirilməsini tələb edib.
Pezeşkian yaşlılar, uşaqlar və xüsusi xəstələr kimi həssas qruplara xüsusi diqqətin dövlətin əsas prioritetlərindən biri olduğunu bildirib.
Prezident əlavə olaraq, görülən işlər barədə hökumətə mütəmadi, şəffaf və dəqiq hesabatlar təqdim etməyi tapşırıb.
