Rusiya Prezidenti Vladimir Putin Silahlı Qüvvələrin ştat sayının artırılması barədə fərman imzalayıb.
Senzor.az yerli KİV-ə istinadən bildirir ki, fərmana əsasən, Rusiya ordusunun ümumi ştat sayı 2 milyon 426 min 130 nəfərə çatdırılır. Hərbi qulluqçuların sayı isə 1 milyon 510 min yox, 1 milyon 535 min nəfər olacaq.
Sənəd avqustun 1-dən qüvvəyə minəcək. Fərmanda qeyd olunur ki, dəyişikliklər Rusiya Silahlı Qüvvələrində hərbi-tikinti bölmələrinin yaradılması ilə əlaqədardır.
Bundan bir qədər əvvəl ordunun ştat sayının 2 milyon 399 min 130 nəfərə çatdırılması barədə fərman imzalanmışdı. Amma onda artımın səbəbi açıqlanmamışdı.
Bu, 2026-cı ilin mart və iyun aylarında qəbul edilən qərarlardan sonra son altı ayda ordunun sayının artırılması ilə bağlı üçüncü fərmandır. Rusiya-Ukrayna müharibəsi başlayandan bəri isə Vladimir Putin ordunun sayını altıncı dəfə artırıb.
