Çərşənbə günü səhər saatlarında Birləşmiş Krallığın hava limanlarında 170-dən artıq uçuş ləğv edilib. Problemin kökündə çərşənbə axşamı baş verən texniki nasazlıq dayanır.
Bu barədə "Euronews" məlumat yayıb. Bildirilib ki, Böyük Britaniyaya və geriyə uçan sərnişinlər hava nəqliyyatında ciddi ləngimələrlə qarşılaşıblar.
Vəziyyətin yaranmasına çərşənbə axşamı hava hərəkətinin idarəedilməsi sistemlərində qeydə alınan qəza səbəb olub. "Flightradar24" xidmətinin statistikasına əsasən, bir gün əvvəl 1300-dən, çərşənbə günü səhər isə 170-dən çox reys təxirə salınıb. Dayanmalar Hitrou, Qatvik, Mançester və Birmingem kimi aeroportların fəaliyyətinə mənfi təsir edib. Milli Hava Hərəkəti Xidməti (NATS) uçuş məlumatlarının emalı sistemində nasazlıq tapdıqlarını bildirsə də, sonradan bu problemin aradan qaldırıldığını təsdiqləyib.
"Sistemdəki problem artıq həllini tapıb, biz adi rejimdə fəaliyyət göstəririk və yığılıb qalmış reys növbələrini tənzimləmək üçün mümkün olan hər şeyi edirik", - deyə NATS sosial şəbəkələrdə məlumat yayıb və eyni zamanda, yaranmış narahatlığa görə sərnişinlərdən üzr istəyib.
Bununla belə, aviaşirkətlər və hava limanları toplanmış gecikmələri sahmana salmaqla məşğul olduqları üçün uçuş cədvəllərindəki kənarlaşmalar hələ də davam edir. Texniki çətinliklər Luton, Stansted, Liverpul və Edinburqla yanaşı, İrlandiyadakı Dublin hava limanına da öz təsirini göstərib.
Nəqliyyat naziri Heydi Aleksander uçuşların tam şəkildə bərpa edilməsinin müəyyən vaxt aparacağını vurğulayaraq, sərnişinləri uçuşlarla bağlı ən son məlumatları xidmət göstərən aviaşirkətlərdən öyrənməyə davam etməyə çağırıb.
