Almaniyanın hakimiyyət orqanları Rusiya xüsusi xidmət orqanlarına işlədiyi ehtimal olunan rusiyalı diplomatları ölkədən çıxarmaq istəyir.“Bild” qəzeti xəbər verir ki, müvafiq qərar bu həftə qəbul edilə bilər. Nəşrin məlumatına görə, Kansler Olaf Şolts məsələnin araşdırılması barədə göstəriş verib. Söhbət 100-ə yaxın rusiyalı diplomatdan gedir.
Bu cür bəyanatlar Rusiyanın Ukraynaya qarşı başladığı müharibə fonunda Belçika, Hollandiya və İrlandiyanın rus diplomatlarını ölkədən çıxarmaq barədə qərarından sonra səslənməyə başlayıb. Belə ki, ötən həftə Belçikadan 21, Hollandiyadan 17, İrlandiyadan 4 rusiyalı diplomatın çıxarılması qərara alınıb. Bundan öncə isə Avropa İttifaqının bir sıra ölkələri, o cümlədən Litva, Latviya, Estoniya, Bolqarıstan, Polşa, Slovakiya və Çexiya rusiyalı diplomatlardan ölkədən çıxmalarını tələb ediblər.
Senzor.az xatırladır ki, bir müddət öncə “Bild” Almaniyada Rusiya kəşfiyyatına işləyən 2 mindən çox şəxsin olduğunu yazmışdı.
