Türkiyə Prezidenti Rəcəb Tayyib Ərdoğan Səudiyyə Ərəbistanına səfərə gedib.Senzor.az “Anadolu” agentliyinə istinadən bildirir ki, Türkiyənin dövlət başçısını Ciddə şəhərinin Kral Əbdüləziz adına hava limanında Məkkə əmiri Şahzadə Xalid bin Feysəl, Türkiyənin Ər-Riyaddakı səfiri Fatih Ulusoy, Türkiyənin İslam Əməkdaşlıq Təşkilatı (İƏT) yanında daimi nümayəndəsi Mehmet Metin Eker və digər rəsmi şəxslər qarşılayıblar. .
Ciddədəki Əl-Salam sarayında Türkiyə dövlətinin başçısının Kral Salman bin Əbdüləziz Əl Səud ilə rəsmi görüşü olub.
Türkiyə və Səudiyyə Ərəbistanının dövlət himnləri səsləndirilib.
Daha sonra prezident Ərdoğan və Kral Salman iki ölkənin nümayəndə heyətlərinin üzvləri ilə söhbət ediblər. Qarşılanma mərasimindən sonra liderlər birgə şam yeməyinə gediblər.
Prezident Ərdoğan görüş çərçivəsində Səudiyyə Ərəbistanı kralı Salman bin Əbdüləziz Əl Səud ilə danışıqlar aparacaq.
Liderlərin Türkiyə ilə Səudiyyə Ərəbistanı arasında əlaqələrin müxtəlif aspektlərini, eləcə də ikitərəfli əməkdaşlığın inkişaf etdirilməsi imkanlarını müzakirə edəcəyi gözlənilir.
Türkiyə liderinin iki günlük səfəri Səudiyyə Ərəbistanı Kralının dəvəti ilə təşkil olunub.
Prezident Ərdoğanı səfərdə həyat yoldaşı Əminə Ərdoğan, daxili işlər naziri Süleyman Soylu, milli müdafiə naziri Hulusi Akar, ədliyyə naziri Bəkir Bozdağ, səhiyyə naziri Fahrettin Koca, xəzinə və maliyyə naziri Nurəddin Nebati, mədəniyyət və turizm naziri Mehmet Nuri Ersoy, ticarət naziri Mehmet Muş, hakim Ədalət və İnkişaf Partiyasının (AKP) sədr müavini Binəli Yıldırım, Milli Kəşfiyyat Təşkilatının (MİT) rəhbəri Hakan Fidan, Türkiyə Prezident Administrasiyasının Kommunikasiya şöbəsinin rəhbəri Fahrettin Altun, Prezident Administrasiyasının rəhbəri Mətin Kıratlı və Türkiyə Prezidenti Aparatının rəhbəri Həsən Doğan müşayiət edirlər.
Senzor.az
