"Gürcüstanda koronavirusun 5-ci dalğası gözlənilir. Amma düşünürəm ki, bu dalğa 3-cü və 4-cü dalğalar kimi ağır olmayacaq".
AzərTAc xəbər verir ki, bunu Tbilisi Yoluxucu Xəstəliklər Xəstəxanasının direktoru, baş infeksionist Tengiz Tsertsivadze deyib.
Onun sözlərinə görə, ölkə epidemiyanın ən çətin günlərini artıq geridə qoyub.
"Bununla belə, təhlükə hər zaman var və arxayınlasmaq olmaz. Tibbi maskadan maksimum dərəcədə istifadə etmək və vaksinasiya olunmaq vacibdir", - deyə baş infeksionist vurğulayıb.
Qeyd edək ki, son sutkada Gürcüstanda daha 1965 nəfər koronavirusa yoluxub, 3996 nəfər sağalıb, 50 nəfər isə ölüb.
Bununla da, ölkədə koronavirusa yoluxanların ümumi sayı 567 min 933-yə, sagalanların sayı 523 min 669-a, pandemiya qurbanlarının sayı isə 7 min 917-yə çatıb.
